Educación empieza una campaña pa incentivar la matriculación d'estudiantes en llingua asturiana y n'eonaviegu
AGORA
La novedá ye que va desenvolvese en dos foles coincidiendo colos periodos de solicitú de plaza y de la matrícula mesma
11 abr 2024 . Actualizado a las 11:32 h.La Conseyería d’Educación empezó una campaña pa incentivar la matriculación del alumnáu de Primaria, Secundaria y Bachilleratu en llingua asturiana y n’eonaviegu en centros sosteníos con fondos públicos pal cursu 2024/2025. La novedá principal ye que va desenvolvese en dos foles coincidiendo colos periodos de solicitú de places y de matriculación, respectivamente.
La campaña publicitaria, que lleva de lema Apúntome, apuntámoslos, va difundise en medios impresos, dixitales y nes redes sociales Facebook y Instagram. L’oxetivu foi compaxinar los formatos tradicionales coles canales nueves de comunicación usaes pola xente más mozo.
La primer fola empieza güei y va allargase hasta’l 21 d’abril, un día enantes d’empezar la fase d’almisión, que va tar abierta hasta’l 7 de mayu. La segunda fola de la campaña va ser del 13 al 23 de xunu. Pela so parte, el periodu de matriculación va desenvolvese del 19 al 26 de xunu pal alumnáu d’Infantil y Primaria, y del 1 al 12 de xunetu pa los estudiantes de Secundaria y Bachilleratu.
La campaña incide nel valir de la diversidá llingüística y cultural, el valir amestáu que tien estudiar les llingües d’Asturies en cada etapa educativa y la so rellación coles señes d’identidá autóctones. Incluye un lema adaptáu al públicu oxetivu, que sorraya la ufierta nes enseñances obligatories y el Bachilleratu. La campaña diríxese a costafecha a la comunidá educativa y tamién a tola sociedá asturiana, con un diseñu visual guapu pa la población más mozo y nun llinguaxe accesible y afayadizu pa tolos públicos. Ye moderna, dinámica y d’alcuerdu con una sociedá que favorez la convivencia, la integración y les tradiciones. Cada acción usa la etiqueta #educallingua.
Amás, dexa claro que ye ufierta obligatoria nes etapes educatives mentaes (Primaria, ESO y Bachilleratu) y abierta a cualquier estudiante interesáu en cursar la materia. Tamién tien presente la igualdá, diversidá, equidá y calidá educativa y con un usu non sexista del llinguaxe. Los conteníos de la campaña tán disponibles nel portal Educastur (educastur.es/asturiano/centros), onde figura tamién información básica sobre estes enseñances y les feches de matriculación.
Materiales de refuerzu de la campaña
Per otru llau, la conseyería va repartir nestos díes nos centros educativos una partida de materiales que tamién tienen como oxetivu incentivar la matriculación. La entrega va facese tamién en dos fases: una primera, compuesta de folletos informativos desplegables y cartelos y, depués, pal periodu de matriculación, dellos marcapáxines col calendariu escolar del cursu que vien.
Esta campaña respuende al compromisu de la Conseyería d’Educación en promover l’usu, la difusión y la enseñanza del asturianu y l’eonaviegu, en cumplimientu de la Llei 1/1998, de 23 de marzo, amás de potenciar la pluralidá llingüística y cultural del Principáu.
La iniciativa coincide, amás, con un cursu escolar onde la materia de Llingua Asturiana y Lliteratura esperimentó una medría de 822 matriculaos. De los 19.202 estudiantes del cursu 2022/2023 pasó anguaño a 20.024 alumnos y alumnes d’asturianu y eonaviegu en Primaria, Secundaria Obligatoria y Bachilleratu.